Дүйім ел асыға күткен Қазақ футболының 100 жылдық мерейтойы қыркүйектің 20-22 күндері отандық аяқдоптың кіндігі кесілген Семей қаласында өтеді. Осыған дейін мәлім болғандай, бұл айтулы мерекеге республика аумағынан тыс шет мемлекеттерден мәртебелі меймандар, спорт ардагерлері қатысады, деп хабарлайды Altaynews.kz тілшісі.

Салтанатты шара 20-қыркүйек күні «Ярыш» футбол командасының тұңғыш капитаны Ю.Нигматуллинге арналған мемориалдық тақтаның ашылуымен басталып, Семей қаласы әкімінің жүлдесі үшін аула клубтары арасындағы «Былғары доп» турниріне жалғасады.

Сол сияқты М.Әуезовтің ескерткішіне гүл шоқтарын қойып, тағзым ету рәсімі болады.

21 қыркүйек күнгі мерекенің көрігі футбол жұл-дыздарының қатысуымен жүргізілетін баспасөз мәсли-хатымен қыза түспек. Кеме жөндеу зауыты ауданында жаңадан футбол алаңының ашылуы, «Қазақстан футболына – 100 жыл» атты көшенің лентасын қию рәсімі, Шәкерім атындағы СМУ-да өтетін халықаралық ғылыми-практикалық конференция, республикалық велошерудің қатысушыларын қарсы алу, күрделі жөндеуден кейінгі «Спартак» стадионының салтанатты ашылуы және онда болатын спорттық-концерттік шоу осы күні қала тұрғындары мен қонақтарына көтеріңкі көңіл күй сыйламақ.

22 қыркүйекте түске дейін «Миллиондар кубогы» тур-нирінің ақтық ойыны мен футбол ардагерлері арасындағы жолдастық кездесу өтеді. Сондай-ақ, Д.Тұрлыханов атындағы қазақ күресінен халықаралық турнирмен қатар, қала мұражайларында мерейтой құрметіне арналған көрме ашылады. Балалар волейболының фестивалі де өз көрермендерін қызыққа кенелтпек.
Осынау мерекенің соңғы аккорды орталық алаңда қазақ эстрада жұлдыздарының қатысуымен ұйымдастырылатын шоу-бағдарлама, отшашумен түйінделеді.

Айта кетейік, торқалы тойымызға УЕФА-ның және әлем футболының өкілдері, Ресей, Украина, Грузия, Өзбекстан, Қырғызстан сияқты ТМД елдерінен спорт ардагерлерінен жасақталған футбол командалары келеді.