Биылғы жаңбырлы жаз егін шаруашылығы саласындағыларды едәуір әбігерге салып отыр. Соған қарамастан облыс әкімі Бердібек Сапарбаев басталып кеткен егін орағын сапалы, уақытында аяқтап шығудың маңыздылығына тоқталып, егін орағын жүргізуде аймақтың ауыл шаруашылығы саласының алдында тұрған міндеттер мен шешімін күткен мәселелерді саралап, талқылады, деп хабарлайды Аltaynews.kz тілшісі.
– 2010 жылы да осындай ауа райы болғанын білесіздер, орта есеппен әр гектардан бес центнерден өнім жоғалттық, соның өзі сабақ болуы керек. Ендігі ең өзекті мәселе – еккен егінді төкпей-шашпай, ысырапсыз жинап алу. Биылғы болжанып отырған астық түсімі жаман емес. Жекелеген кейбір техника түрлері болмаса, техника күштері жеткілікті, жанар-жағармай толық жеткізіліп отыр, элеваторлар мен қоймалар астық қабылдауға, кептіруге әзір,- деді өңір басшысы селекторлық кеңесте.
