Шығыс Қазақстанның жалпы білім беретін мектептерінің 11-сынып оқушылары арасында ұйымдастырылған «Журналист болғың келсе..» атты конкурстың бас жүлдесі Қарауыл гимназиясының 11-сынып оқушысы Серік Мұратовқа бұйырды , деп хабарлайды Аltaynews.kz тілшісі.
Жеңімпаз болашақта университеттің журналистика мамандығының студенті қатарынан көрінсе жалпы оқу ақысына, яғни 4 жыл бойы 25%, бірінші орынды иеленген № 33 мектептің оқушысы Жанарбек Бақытгүлге бір оқу жылына 25% жеңілдіктер жасалады. Жеңімпаздар Мақтау қағазымен марапатталып, арнайы сертификатқа ие болды. 
Шәкәрім атындағы Семей мемлекеттік университетінде қазақ филологиясы кафедрасының ұйымдастырумен өткен конкурсқа қала мектептерімен қатар Абай, Тарбағатай, Үржар аудандарынан да оқушылар келіп, 80 оқушы білімдерін көрсетті.
Конкурст екі турдан тұрды. Оқушылар « Қаламым жүйткі, қарышта» атты 1-турда еркін тақырыпта шығарма жазса, «Өлеңді өміріме серік еттім» атты 2-турда мәнерлеп оқу қабілеттерін танытты.
Конкурс қорытындысын шығаруға, қазылар алқасының құрамына тәжірибиелі журналистер мен аймақтық журналистика мамандығының үздік оқытушылары шақырылды.
«Бүгінгі ұйымдастырылып отырған іс- шараның басты мақсаты- қаламы ұшқыр, талабы бар баланы қолдап, оның ары қарай шыңдалуына жол ашу. Байқауға қатысушы балалардың дайындығы өте жақсы. Айта кететін жайт, қазылар алқасы 2 турмен ғана шектелмей, баланың бұрын- соңды газет беттеріне жарияланған жұмыстарына да назар аударды. Бірінші рет ұйымдастырылып отырған сайыс болғандықтан, болашақта жиі өткізіп тұру жоспарымызда бар. », - деді іс- шараға ұйытқы болып жүрген профессор А. Рамазан.
Біліктілігімен дара шыққан екінші, үшінші орын иегерлеріне де мақтау қағаздары табыс етіліп, арнайы номинациялар бойынша да жекелеген оқушылар марапатталды.
Конкурсқа қатысқан барлық оқушылар олжалы қайтты.
Ә. Жұмағұлова
