Семейде алғаш рет жоғары оқу орындарының басшылары, профессор-оқытушылар құрамы және қызметкерлер қауымы арасында волейболдан жарыс өтті. Дүбірлі жарыстың ұйымдастырушысы - Семей мемлекеттік педагогикалық институтының ректоры, профессор Мақтағали Әбдімәжитұлы Бектемесов, деп хабарлайды Altaynews.kz.

Бұқаралық спортты дәріптеуге етене кіріскен ағарту ісінің мамандары жұмыс уақыты аяқталғаннан кейін Шәкәрім атындағы Семей мемлекеттік университетінің спорт залында жиналып, «Ректорлар кубогін» сарапқа салды. Үш күнге созылған дүбірлі жарыста бес команда бақ сынасты.

Сайыстардың қорытындысы бойынша, тәжірибесі мол Семей мемлекеттік медицина университетінің ойыншылары бірінші орынға ие болды. Команда құрамындағы нәзік жан иелері ер азаматтармен бірдей ойын көрсетті. Айта кететін жайт, аталмыш оқу орнында волейбол ойнау дәстүрге айналған. Сонау Кеңес үкіметі кезінде КСРО медициналық жоғары оқу орындары арасында волейболдан өткен жарыста әйелдер командасы ІІІ орын алғаны баршаға аян.

Шәкәрім атындағы Семей мемлекттік университетінің командасы ширақтық танытып, екінші орынды қанжығасына байлады. Ал, үшінші орынға Семей мемлекеттік педагогикалық институтының командасы шықты, Жеңімпаздарға мақтау қағаздары, дипломдар мен кубоктар табыс етілді.

Жүлделі орындармен қатар «Үздік шабуылшы», «Үздік ойыншы», «Үздік қорғаушы» номинациялары бойынша да жеңімпаздар анықталып, оларға да сый-сияпат көрсетілді.

Шәкәрім атындағы СМУ оқу істері жөніндегі проректоры Бердан Әбдәзімұлы Рскелдиев осындай жарыстарды дәстүрлі түрде өткізіп тұруды ұсынды.

Анар Қуанғалиева