Футболдан бірінші лига командалары арасындағы ел чемпионатының 32-ші турында қонақта Теміртаудың «Шахтер-Болат» командасымен кездескен семейлік «Алтай» 1:0 есебімен жеңіске жетті, деп хабарлайды Алтайньюс тілшісі.

Аталған ойындағы жалғыз допты матчтың екінші минутында жартылай қорғаушы Ойбек Балтабаев соқты. Айта кетейік, бұл алтайлықтардың биылғы біріншілік аясында жеткен 17-ші жеңісі болды.

Дегенмен бұл турда «Алтайдың» негізгі қарсыластарының бірі – шымкенттік «Қыран» да үш ұпай еншілеп, осының арқасында турнир кестесіндегі үшінші орнын сақтап қала алды. Екі команда арасын бұрынғыдай үш ұпай бөліп тұр.

Жерлестеріміз биылғы біріншілік аясындағы соңғы кездесуін 4 қараша, жексенбі күні өткізбек. Бұл күні Сергей Тимофеев шәкірттері өз алаңында қызылордалық «Байқоңырды» қабылдайды.