Осыдан бір жыл бұрын құрылған тұңғыш қазақстандық «Altay Athletics» кәсіби жеңіл атлетика клубының аясы кеңейіп келеді, деп хабарлайды Алтайньюс тілшісі.

Енді шығысқазақстандық клубтың құрамында «Altay Athletics-2» деп аталатын тағы бір команда бар. Облыстық денешынықтыру және спорт басқармасының басшысы Асқар Можанов мәлімдегендей, «Altay Athletics» клубы жанынан тағы бір команда жасақтаудағы мақсат жергілікті жас спортшыларды қолдау және кәсіби тұрғыдан шеберліктерін шыңдай түсуге ықпал ету болыпты.

Клубтың атқарушы директоры Асхат Сейсембеков «Altay Athletics-2» командасына 19 жасқа дейінгі болашағынан зор үміт күттіретін спортшылар топтастырылғанын айтуда. Және ең бастысы бұл қыз-жігіттердің барлығы да өзіміздің жерлестер, Шығыс Қазақстан облысының өкілдері екен. Қазір командада Ефим Тарасов, Елизавета Матвеева, Дарья Демченко, Екатерина Ефремова сияқты 19 жас жеңіл атлет бар.

– Ендігі мақсатымыз жаттығу үдерісі кезінде спортшыларға материалдық және техникалық жағынан қолдау көрсету. Сондай-ақ оларды халықаралық жарыстарға қатыстыру. Жас атлеттер үшін шетелде өтетін жарыстарға қатысудың пайдасы орасан зор болатыны айтпаса да түсінікті. Ал олардың Ольга Рыпакова сияқты негізгі команданың беткеұстар спортшыларымен бірге жаттығуы тәжірибе жинақтауға, кәсіби шеберліктерін ширата түсуге мүмкіндік береді, – дейді Асхат Сейсембеков.

Айта кетейік, «Altay Athletics-2» клубының менеджері болып өскемендік бапкер Павел Кукин тағайындалды.