Демалыс күндері Катонқарағай ауданына жұмыс сапарымен барған облыс әкімі Даниал Ахметов тұрғындардың  қойған сауалдарына да жауап берді, деп хабарлайды Алтайньюс тілшісі.

– Алтай – бүкіл түркі жұртының атамекені. Осы жерде тамаша тарихымыз жатыр. Жылына 20 мыңдай турист келеді. Сондықтан бұл жерде туризмді де, медициналық туризмді де жақсылап дамытуға болады. Бұл ғимаратқа кәсіпкерлер алдымен шетелден келгендерге ұялмай көрсететін жөндеу жасасын, ал біз заманауи медициналық құрал-жабдықтар алып берейік. Келушілерге қажетті кинотеатр, мейрамхана да ашылсын, тіпті қажет болса Қытайдан білікті дәрігерлер алдырайық. Елімізден сынықшы тағы да басқа халықтық емшілерді де жинайық. Ал аудан орталығында әуежай ашу мәселесіне келсек, одан гөрі Алтай мен Үлкен Нарын арасына жақсылап жол салған маңызды. Сонда тұрғындар Үлкен Нарыннан Өскеменге екі жарым сағатта жетеді. Дегенмен, бұл мәселені жақсылай ойлану қажет, - деді облыс әкімі кездесуді қорытындылап.