Өскемендегі облыстық тарихи-өлкетану музейінде Жеңістің 80 жылдығына арналған ерекше көрме ашылды. Бұл көрме шынайы жәдігерлер арқылы Шығыс Қазақстаннан шыққан соғыс ардагерлерінің ерлігін баяндайды. Қала тұрғындары мен қонақтары өткеннің оқиғаларын тереңірек ұғынып, тірі тарихпен қауыша алады, деп хабарлайды Altainews.kz тілшісі.

Экспозиция бірнеше бөлімнен тұрады және олардың әрқайсысы музей қорынан алынған құнды коллекциялармен толықтырылған. Бұл материалдар ұзақ жылдар бойы жүргізілген ғылыми-зерттеу және ізденіс жұмыстарының нәтижесінде жиналған.

Көрменің бір бөлігінде Шығыс Қазақстаннан шыққан Кеңес одағының батырлары, «Даңқ» орденінің толық иегерлері және «Халық қаһарманы» атағын иеленген жауынгерлер туралы сирек деректер ұсынылған. Мұнда жауынгерлік және еңбек ерліктері үшін берілген марапаттар, әскери киімдер мен жабдықтар, сарбаздар мен офицерлердің тұрмыстық заттары қойылған. Мысалы, 837-ші атқыштар полкінің саяси жетекшісі, капитан Рудоваловтың шинелі сақталып қалған. Бұл полк дәл осы Өскеменде құрылған. Кейіннен ол аты аңызға айналған 30-шы гвардиялық дивизия құрамына енді. Бүгінде Өскемендегі бір көше осы дивизияның құрметіне аталған.

Көрмеде ерекше әсер қалдыратын – соғыс жылдарындағы фотосуреттер.

Соғыс жылдарының аса құнды жәдігерлері – майданнан келген хаттар: үшбұрышты сарбаз хаттары, құпия хаттар, ашықхаттар мен пошта карточкалары. Бұл хаттарда үйдегі жақындарға деген махаббат, жылулық пен үміт сақталған. Әсіресе, балаларға арналған хаттар ерекше орын алады, оларда мейірім, қамқорлық және соғыс жағдайында да жоғалмаған адамдық көрініс тапқан.

Көрменің тағы бір бөлімі тыл еңбеккерлерінің Жеңіске қосқан үлесін баяндайды. Экскурсия жетекшілерінің айтуынша, соғыс жылдарында Кенді Алтайда түсті металдар өндірісі 2,5 есе артқан.

Экспонаттармен танысу Жеңістің оңай келмегенін, бірліктің құнын, ерлік пен патриотизмнің маңызын еске салады.

 Фото: Жібек Нұрахмет