Жыл басынан бері Қазақстанда құтқарушылар мыңдаған апаттың алдын алды. Өз ісінің нағыз кәсіби мамандарының жедел әрі нақты әрекеттерінің арқасында өрт кезінде 1459 газ баллон қауіпсіз жерге шығарылды. Олардың 385-і – үлкен 50 литрлік сыйымдылықтағы баллондар, деп хабарлайды Altainews.kz тілшісі Төтенше жағдайлар министрлігіне сілтеме жасай отырып. 

Газ баллондары бар үйдегі өрт – ең қауіпті жағдайлардың бірі. Мұнда әрбір қозғалыс пен шешім адам тағдырын арқалайды. Өрт сөндірушілер тек жалынды ауыздықтап қана қоймай, жарылыс қаупін сейілтіп, үлкен қираулардың да алдын алады. 

Азаматтық қорғау органдарының өкілдері тұрғындарға қауіпсіздік ережелерін қатаң сақтаудың маңызын еске салады. 

Төтенше жағдайлар министрлігі мынадай қарапайым, бірақ өмірлік маңызды қағидаларды есте ұстауға шақырады:

• газ баллондарын тек арнайы бекітілген пункттерде ғана толтырыңыз; автожанармай құю станцияларында тұрмыстық баллон құюға тыйым салынады;
• екі қабаттан жоғары ғимараттарда газ баллондарын пайдалануға болмайды;
• баллонды жылытуға немесе күн астында қалдыруға жол бермеңіз;
• газдың иісі сезілсе, бірден кранды жауып, терезе мен есікті ашып, электр қуатын қоспай, ашық отты пайдаланбаңыз;
• жұмыс істеп тұрған құрылғыларды қараусыз қалдырмаңыз және балалардың өз бетінше пайдалануына жол бермеңіз;
• газдың ағып кетуін тексергенде сабынды ерітінді қолданған дұрыс.