Ағымдағы жылдың 18-19 қазан күндері Өскемен қаласында «Туған жер-алтын бесігім» жобасы шеңберінде Риддер қаласының мәдени күндері өтіп жатыр,- деп хабарлайды Altainews.kz тілшісі. 

Шара Риддер қалалық музейінің сәндік-қолданбалы өнері мен экспонаттарының көрмесімен басталды. 
Көрмеге риддерлік қолөнер шеберлерінің қолдан жасалған тоқыма бұйымдары, сырмақ, текеметтер, ежелгі қару-жарақтар, ағаштан ойып жасалған аң-құстардың мүсіндері, 17-18 ғасырларда грек тілінен көне орыс тіліне аударылған көне кітаптар, риддерлік ақын-жазушылардың туындылары, сондай-ақ бал өнімдері, шөптен жасалған шай, тұздалған көкөніс түрлері және т.б. қойылды. 

Көрмеге келген өскемендіктер Риддер қалалық музейінің сәндік-қолданбалы өнері мен экспонаттарының көрмесін тамашалай жүріп, Риддер қаласының өткен-кеткен тарихымен танысып, қала жайлы мол мағлұмат алды. 
Көрменің соңы бір жарым сағатқа созылған риддерлік өнерпаздардың гала-концертіне ұласты.  

Концертте Қазақстанға танымал «Ұлытау» тобы да өнер көрсетіп, тыңдаушылардың қошеметіне бөленді. Риддерліктердің гала-концертіне облыс әкімі Ермек Көшербаев және орынбасарлары да қатысты. 
Риддерліктердің мәдени шеруі ертең, яғни, 19 қазан күні сағат 07.00-ден бастап (Жібек Жол даңғылы 44) Риддер қаласы өнімдерінің әлеуметтік баға бойынша демалыс күнгі жәрмеңкеде жалғасын тауып, соңы көркемөнерпаздар концертімен аяқталмақ.

Серік Құсанбаев