Барлық ауылындағы клубтың жөндеу жұмыстары аяқталып қалды – ШҚО
Республика күні қарсаңында Катонқарағай ауданындағы Барлық ауылының клубы жөндеу жұмыстарынан кейін ашылмақ. Төрт жүзге жуық тұрғыны бар ауыл үшін бұл мәдени ошақтың маңызы зор, деп хабарлайды Altainews.kz тілшісі.
Клуб 2010 жылы пайдалануға берілген болатын. Мәдени ошаққа он төрт жылдан бері ешқандай жөндеу жүргізілмепті.
– Жөндеу жұмыстары Amanat партиясы сайлауалды бағдарламасының Жол картасы аясында жүргізілді. Биыл 28 тамызда басталған жұмыстар жуырда толық аяқталып, Республика күні қарсаңында тұрғындарға тамаша сыйлық болады, – дейді Катонқарағай аудандық ішкі саясат, мәдениет, тілдерді дамыту және спорт бөлімінің басшысы Гүлнара Мақұлбекқызы.
Жобалық-сметалық құжаттамаға сәйкес клуб ғимаратының есік-терезелері, едені ауыстырылып, сахна жөнделді. Ішкі қабырғаларын түзету, бояу, сыртын металлосайдингпен қаптау, электр сымдарын, шатырды ауыстыру, ауланы қоршау сияқты жұмыстар атқарылды. Бұл жұмыстарға облыстық бюджеттен 21 043 680 теңге бөлінді.
– Клубымыздың жаңарғанына қуаныштымыз. Клубта «Еркем-ай» домбыра және «Бал гүлі» би үйірмелері жұмыс істейді. Балаларымыз осы үйірмелерге қатысып, бос уақыттарын қызықты әрі пайдалы өткізеді деп сенеміз. Ауылымызда орта мектеп бар, фельдшерлік пункт салынып жатыр, – дейді ауыл тұрғыны.
Оқи отырыңыз
