ШҚО-дағы мамандандырылған орталықта жылына 6 мың адам оңалтудан өтеді
Өскемен қаласындағы облыстық мамандандырылған оңалту орталығы - Қазақстанда алғаш рет ашылған осындай бейіндегі мекеме.
Биыл орталықтың жұмыс істеп тұрғанына сегіз жыл толды. Орталықта жылына алты мыңнан астам шығысқазақстандық оңалтудан өтіп, олардың 90 пайызы қалыпты өмірге қайта оралады, деп хабарлайды Altaynews.kz тілшісі.
2015 жылы сол кездегі облыс әкімі Сапарбаев Бердібек Мәшбекұлының бастамасымен бой көтерген. Германия, Оңтүстік Корея сияқты елдердің озық медицина жабдықтарымен жабдықталған емдеу орнында стационарлық және емханалық көмек көрсетіледі.
Оңалту ем-домы неврологиялық, кардиологиялық бағыттағы және ортопедиялық оталар жасатқан науқастарға үш кезеңмен жүргізіледі. Бұдан басқа ақылы қызметтер де қарастырылған.
82 жастағы Бәтен әже 30 қараша күні инфаркт алып, облыстық ауруханада күрделі ота жасатып шығыпты. Он күн бойы оңалтудың екінші кезеңінен өтіп жүр. Қария жағдайының жақсарып қалғанын айтып, барлық дәрігерлерге алғысын жеткізді.
ШҚО денсаулық сақтау басқармасының баспасөз хатшысы Әсем Қайратбек 2024 жылы облыста оңалту көмегіне МӘМС шеңберінде әлеуметтік медициналық сақтандыру қорынан 3.3 млрд теңге бөлінгенін айтты.
Фото: Валерий Шведов