Орман өртінен шыққан қалың түтінге байланысты осы уақытқа дейін Семей қаласына қарасты Бұлақ ауылының 80-ге жуық тұрғыны эвакуацияланған. Тұрғындар эвакуациялық пункттерге орналастырылып, азық-түлік және қажетті заттармен қамтылды.

Бұлақ ауылының эвакуацияланған тұрғындарының жағдайы туралы әкімдік мәлімдеді, деп хабарлайды Altaynews тілшісі.

Әкімдіктің дерегіне сүйенсек, қазір тұрғындардың жағдайы жақсы, қажетті заттармен қамтылған. Сонымен қатар әкімдік еріктілермен бірлесіп табиғи апат аймағында да тұрғындарға көмек көрсетіп жатқанын хабарлады.

Қазіргі таңда Семей қаласындағы 3 эвакуациялық пунктте Талица, Половинки, Бұлақ сынды ауылдардың 150-ге жуық тұрғыны орналастырылған. Қалада жабдықталған 9 эвакуациялық пункт бар. Пункттерде қажет жағдайда 800-ге жуық адамды қабылдауға болады, дейді әкімдік.