12 қыркүйек күні Ашық НҚА порталында 2021 жылы қабылданған "Қазақстан Республикасында жергілікті өзін-өзі басқаруды дамытудың 2025 жылға дейінгі тұжырымдамасына" өзгеріс енгізу жобасы әзірленді, деп хабарлайды Altaynews.kz Zakon.kz сайтына сілтеме жасап.
Жобаға сәйкес, әкімшілік-аумақтық заңнаманың талаптарына сәйкес келмейтін қалалардың, яғни халық саны 10 мың адамнан кем қаланың әкімшілік мәртебесін өзгерту процесі жүргізіледі. Қазір мұндай үш қала бар:
- Степняк (Ақмола облысы) – 3,8 мың адам;
- Темір (Ақтөбе облысы) – 2,1 мың адам;
- Жем (Ақтөбе облысы) – 1,5 мың.
Ал кейбір халқы көп ауылдар, керісінше, қала мәртебесіне ие болады. Елімізде осындай 17 елді мекен бар, олардың ең ірілері:
- Маңғыстау облысындағы Бейнеу ауылы – 54 мың адам;
- Түркістан облысындағы Қарабұлақ ауылы – 50 мың адам;
- Алматы облысындағы Ұзынағаш ауылы – 47 мың адам және басқа да ауылдар.
Құжат 26 қыркүйекке дейін талқылау үшін Ашық НҚА порталында жарияланған.
