Биыл 26 ақпанда KazSat-2 жер серігін белсенді пайдалану мерзімі аяқталады. Бұл туралы Ресейдегі Хруничев атындағы ғарыш орталығының бас директоры Алексей Варочко мәлімдеді, деп хабарлайды Altainews.kz сайты Sputnik Қазақстанға сілтеме жасап.

KazSat-2 жер серігі 2011 жылы 16 шілдеде орбитаға шығарылған болатын. Ал Қазақстаннның республикалық ғарыш байланысы орталығымен арадағы табыстау актісі 26 қарашада рәсімделді.
Осы аппаратты белсенді пайдалану мерзімі 12 жыл 3 айды құрайды және 2024 жылы 26 ақпанда аяқталады.

Оның айтуынша, қазақстандық тарап жер серігін пайдалануды барынша жалғастыруға мүдделі. Ал жаңа ғарыш аппаратын жасау мәселесі әзірше талқылауға шығарылған жоқ. Осы орайда Варочко орталықтың қазіргі стратегиясын да еске салды. Бүгінде жер серіктерін емес, сан алуан санаттағы зымырандарды жасауға басымдық беріледі.

Қазіргі кезде Хруничев атындағы ғарыш орталығының мамандары «KazSat-2»-ге инженерлік тұрғыда қолдау жасап келеді. 

Варочконың айтуынша, KazSat-2 жер серігін жасау кезінде озық технологиялар қолданылған. 

Цифрлық даму, инновациялар және аэроғарыш өнеркәсібі министрлігі таратқан ақпаратқа сәйкес, бүгінде «Kazsat» жүйесі республиканы байланыс пен тарату қызметтерімен толығымен қамтамасыз етіп отыр. Осылайша, елдің стратегиялық және ақпараттық қауіпсіздігіне де кепілдік бар.

KazSat жер серіктерінің қызметін Қазақстандағы байланыс және тарату операторлары пайдаланады. Ал KazSat-2 Қазақстанға ғана емес, Орталық Азия елдеріне де қызмет көрсете алады.

                                                                      Айжанат Бақытқызы