ШҚО ТЖД мамандары жануарларды құтқару бойынша бірнеше шақыртуға барған. Оның бірінде құтқарушылар ағаш басына шығып алған мысықты құтқарған. Өскемендегі ветеринарлық клиникадағы мысықтар қашып, біреуі ағашқа өрмелеп, түсе алмай қалған.

Жануарлар қорғаушылары кәсіби құтқарушыларды шақыруға мәжбүр болған, деп хабарлайды Altaynews тілшісі.

Оқиға орнына жеткен ШҚО ТЖД мамандандырылған жасағының қызметкерлері бастапқыда ағашқа өздері өрмелеп, марғауды түсіріп алуға тырысқанымен нәтиже шықпаған. Кейін құтқарушылар марғауға жету үшін арнайы техника қолданды. ШҚО ТЖД дерегінше, мысық 5-ші қабат деңгейіндегі биіктікке шығып алған.

Ал екінші оқиға Өскемен қаласындағы Бажов көшесінде болған. Аталған көшеде орналасқан құдықтың біріне ит құлап кеткен. ШҚО ТЖД Жедел-құтқару жасағының құтқарушылары арнайы ілмек қолданып, итті шығарып алды.

Жыл басынан бері құтқарушылар 30 ит пен 18 мысықты құтқарған. Ұсынған мәліметке сүйенсек, мысықтар қауіпті жағдайға жиі тап болады. Мысықтар ғимараттардағы құрылымдар арасынан шыға алмай қалып жатады. Ал иттер люктерге, құдықтарға, шұңқырларға жиі құлап кетеді.