Шығыс Қазақстанда қысқы маусым басталғалы бері ауа райының күрт бұзылуына байланысты 54 рет дауыл туралы ескерту жарияланған.

Бұл туралы өңірлік коммуникациялар қызметінде өткен брифинг барысында облыстық ТЖД төтенше жағдайларды жою басқармасының бастығы Ринат Кондыбаев мәлім етті, деп хабарлайды Altaynews.kz тілшісі.

Айта кетейік, «Қыс мезгіліндегі қауіпсіздікті қамтамасыз ету» тақырыбында өткен баспасөз мәслихатына облыстық жолаушылар көлігі және автомобиль жолдары басқармасының басшысы Нұржан Жұмаділов, «Қазгидрометтің» Шығыс Қазақстан және Абай облыстары бойынша филиалының өкілдері Шынар Базарова мен Іңкәр Асқарова, «КАЖсервис» ЖШС облыстық филиалының директоры Еркін Даумов сияқты лауазымды тұлғалар қатысып, журналистердің сұрақтарына жауап берді.

Ал облыстық жолаушылар көлігі және автомобиль жолдары басқармасының басшысы Нұржан Жұмаділовтің айтуынша, жол қызметтері ұзындығы 13 384 қума метр қар ұстайтын қалқандар мен 413 ескерту белгілерін орнатқан.

Брифингте белгілі болғандай, аймақта төтенше жағдайларға жедел ден қою мақсатында жол ұйымдары мен шұғыл қызметтердің бірлескен іс-қимыл жоспары әзірленді. Қажет болған жағдайда 1 726 адам мен 959 бірлік техника көмекке келуге сақадай сай тұр.

Бұған қоса, Ұлан ауданының Привольное ауылында республикалық автожолда зардап шеккендерге шұғыл медициналық көмек көрсету мақсатында трассалық медициналық-құтқару пункті ашылған болатын. Ол, жол бойындағы 15 кафе сияқты, жылыту және тамақтану орындары ретінде де жұмыс істеуде. Осы ретте, бүгінде облыстың автожолдарында жеті жылыту пункті бар екенін де айтқан жөн.