KZ
Өскемен
-32°
туман Штиль
449.88 486.64 4.83

ШҚО геопорталынан бүкіл ақпаратты табуға болады

12.02.2024, 18:00 48 Нұржан Кенжеұлы

2018 жылы облыстық жер қатынастары басқармасы «Цифрлық Қазақстан» мемлекеттік бағдарламасын іске асыру шеңберінде өңірлік геоақпараттық жүйе – Шығыс Қазақстан облысының геопорталын құру бойынша жұмысты бастаған болатын.

Облыстық жер қатынастары басқармасының басшысы Надежда Михейлистің айтуынша, 2021 жылы геопортал тәжірибелік пайдалануға берілген. Ал былтырғы наурыз айынан бастап ол жалпыға қолжетімді болды, деп хабарлайды Altainews.kz тілшісі.

– Геопортал базасында мұрағаттық материалдарды пайдалана отырып елді мекендердің жер учаскелері мен инженерлік коммуникацияларының электронды карталары әзірленді. Аудандардың, елді мекендердің, ауылдық округтердің шекаралары түсірілді. Карталардың қабаттары жаңартылған жер учаскелерін, инженерлік желілер мен коммуникациялардың сызбаларын, бас жоспарды және перспективалы құрылыс аудандарының егжей-тегжейлі жоспарлау жобаларын көрсетеді. Геопорталда негізгі туристік маршруттар, қолданыстағы демалыс базалары, негізгі туристік дестинациялар да орналасқан. Жеке қабатта мемлекетке қайтарылған жер учаскелері жайында да ақпарат алуға болады, – дейді басқарма басшысы.

Тағы бір айта кетер жайт, Шығыс Қазақстан облысының геопорталы 2020 жылдың қараша айында ТМД елдері арасында өткен ArcGIS веб-қосымшалар байқауында бірінші орынға лайық деп танылған.

Бүгін аталмыш геопорталдың мүмкіндіктерімен облыс әкімі Ермек Көшербаев танысып, жобаны әзірлеген авторлармен кездесті.

Жер қатынастары басқармасы басшысының орынбасары Д.Сармановтың айтуынша, геопорталдағы елді мекендер картасында су қорғау аймақтары мен гидрографиялық нысандардың белдеулері, мал қорымдарының санитарлық-қорғау аймақтары сияқты ақпаратты табуға болады. Сондай-ақ картографиялық байланыстырумен карталарда білім беру және денсаулық сақтау нысандарының орналасқан жері де көрсетілген. «Өскемен жылу желілері» АҚ-мен бірлесіп инженерлік желілерге электронды түрде қосылуға техникалық шарттар беру жөніндегі жоба іске асырылған.

– Бүгінде геопорталда жер учаскелерінің кадастрлық бағалау құнын, жер салығы мен жалдау ақысының құнын анықтамалық режимде есептеуге мүмкіндік беретін жер учаскелерін онлайн бағалау модулі де орналастырылған. Геопорталдан «Қазгидромет» РМК-ның деректеріне сүйене отырып, Өскемендегі атмосфералық ауаның жай-күйін онлайн режимде білуге болады. Рұқсат етілмеген полигондарға қатысты экология департаментінің мәліметтерін де таба аласыз. Геопорталда ШҚО төтенше жағдайлар департаментімен бірлесіп аумақтық «Қазселденқорғау» бөлімшелерінің орналасқан жерлері, республикалық және облыстық автожолдардағы қар алып қалуы ықтимал учаскелер, қар көшкіні, сел, жер сілкінісі мен су басу қаупі жоғары аймақтар бойынша ақпарат да топтастырылған, – дейді маман.

Геопорталдың жұмысымен жіті танысқан аймақ басшысы жобаны дамытудың перспективалық бағыттары туралы сөз қозғап, бұл жөнінде бірқатар ұсыныс айтты.

Фото: Аяужан Утеулинова

Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу
Кликните на изображение чтобы обновить код, если он неразборчив