1 тамыздан бастап еліміздегі 88 қалада елді мекендер шегіндегі жер учаскелері жаңа тәртіп бойынша беріледі.

Бұл туралы Шығыс Қазақстан облысының өңірлік коммуникация қызметі алаңында Жер қатынастары басқармасы басшысының орынбасары Дәулет Сарманов, Жер қатынастары басқармасының бөлім басшысы Талапжан Қауашевтың қатысуымен "Жылжымайтын мүліктің бірыңғай мемлекеттік кадастры шеңберінде жер учаскелерін беру ерекшеліктері" тақырыбында өткен баспасөз конференциясында айтылды, деп хабарлайды Altaynews.kz сайты.

ҚР Жер кодексі республикалық маңызы бар қалалар, астана, облыстық және аудандық маңызы бар қалалар шегінде жер учаскелеріне құқықтар берудің жаңа, электронды тәртібін регламенттейтін 44-2-баппен толықтырылды. Атап айтқанда, жер комиссиясы алынып тасталды, сондай-ақ құжаттарды қарау және келісу ұзақтығы қысқартылып отыр.

Жаңа тәртіп жер учаскесіне құқық алуға мүдделі жеке және заңды тұлғалардың «Электронды үкімет» веб-порталы арқылы жария кадастрлық картада сұралып отырған жер учаскесіне бөліп беру схемасын дербес қалыптастыра отырып, өтініш беруін көздейді.

Цифрландыру жер комиссиясын және рәсімдеу шараларын қысқартуға мүмкіндік береді. Ал құжаттарды өткізу мерзімі 30 күнді құрайды. 

Жер учаскесіне құқық алуға өтініш беру EGOV электронды үкімет порталы арқылы жүргізілетін болады.

Қазір заңға тәуелді нормативтік актілердің болмауына байланысты жер учаскелерін берудің ескі тәртібі 2023 жылғы 1 тамызға дейін қолданылады.