Елімізде су тасқынын алдын ала болжау және модельдеу мақсатында әзірленген Tasqyn жүйесі өндірістік қолданысқа енгізілді. Бұл жүйе көктемгі су тасқыны қаупін бағалап, тиімді алдын алу шараларын жүзеге асыруға мүмкіндік береді, деп хабарлайды Altainews.kz тілшісі Су ресурстары және ирригация министрлігіне сілтеме жасап.

Tasqyn қалай жұмыс істейді?

Министрліктің мәліметінше, Tasqyn жүйесі өзендердің 128 учаскесіндегі 142 су бекеті бойынша су тасқынын модельдейді. «Қазсушар» филиалдары мен бассейндік инспекциялардың 114 маманы күнделікті мониторинг жүргізіп, деректерді жүйеге енгізеді. Бұл су тасқыны қаупін уақытында анықтауға және тиісті шараларды қабылдауға көмектеседі.

Tasqyn жүйесі жаһандық GloFAS (су тасқыны жөнінде ескерту беретін халықаралық жүйе) жүйесіне біріктірілген. Алдағы 2025 жылғы су тасқыны кезеңіне қатысты соңғы болжам наурыз айының басында жасалады.

Су тасқынына дайындық жұмыстары аясында министрлік көрші елдермен тұрақты байланыс орнатып, ақпарат алмасу жүйесін жеделдетті. Сонымен қатар, көктемгі су тасқынын тиімді қабылдау үшін қоймаларда бос орындар әзірленуде. Қазіргі таңда еліміздегі су қоймалары 13 миллиард текше метр суды қабылдауға дайын.

Жаңа жүйенің енгізілуі еліміздегі төтенше жағдайлардың алдын алу жұмыстарын жетілдіруге және халықтың қауіпсіздігін қамтамасыз етуге айтарлықтай үлес қосады.