Оған шығысқазақстандықтар белсенді қатысып, аяулы аналарына деген ыстық сезімдерін хатпен жеткізді.

Онлай байқауға әлеуметтік желіде белсенді кез келген облыс тұрғыны қатысуға мүмкіндік алды, деп хабарлайды  Altainews.kz тілшісі.

Отбасылық құндылықтарды насихаттай отырып ата-ана мен бала арасындағы қарым-қатынасты нығайтуға бағытталған игілікті шара 20 ақпанда бастау алып 4 наурызда мәресіне жетті.

Байқауға қатысушылар 28 ақпанға дейін әлеуметтік желілерде #Анама хат – Письмо маме хэштегімен қазақ және орыс тілдерінде хаттарын жариялады. Қалалар мен аудандардың әкімдіктері 29 ақпанда хаттарды іріктеп алды. Онда хаттың шынайылығы, тақырыптың ашылуы, мащмұны, көркемдігі және ерекшелігі бағаланды. Ал 1 наурызда әрбір қала-аудан әкімдігі байқаудың облыстық турына қатысу үшін ШҚО қоғамдық даму басқармасына үздік шыққан екі жұмысты жолдады.

Байқауға қатысушылардың арасында оқушылар да, ересектер де болды. Самарлық оқушы Нұрболат Смайылов анасына арналған тілектерін видеороликпен жеткізген.

Ал Күршім ауданында әскери борышын өтеп жүрген Алтынбек Қайырғалиев Оралда тұратын анасына жүрекжарды хат жолдаған.

Ал зайсандық Нұршырақ Жігер өз хатында ананың қадірін өзі ана атанғанда терең түсіне бастағанын айтады.