Ұлыстың ұлы күні қарсаңында Өскеменде «Керуен сарай» ашылды.

Жаңа сауда үйінің ерекшелігі сол, өңіріміздің түкпір-түкпірінен облыс орталығына ағылған кәсіпкерлер мен фермерлер мұнда өз өнімдерін ешбір делдалсыз тұтынушыларға тікелей ұсынады. Соған сәйкес тауарлардың бағасы да тартымды, деп хабарлайды Altainews.kz тілшісі.

Сонымен қатар аталған сауда кешенінде азық-түлік жәрмеңкесі, түрлі көрмелер мен өзге де шаралар өткізіледі.

Азық-түлік қауіпсіздігін қамтамасыз ету – еліміздің аграрлық және экономикалық саясатының басты мақсаттарының бірі. Осы орайда Шығыс Қазақстан облысының әкімі Ермек Көшербаев сатушы мен алушының арасына «алтын көпір» болатын «Керуен сарайдың» маңызы зор екенін атап өтті.

Сауда кешенінің жалпы аумағы – 32 мың шаршы метр. Мұндай атшаптырым аумаққа бір мезетте 10 мың адам сыйып кетеді. Сатып алушыға да, сатушыға да барлық жағынан қолайлы жағдай жасалған. Сауда орындары ыңғайлы орналасқан әрі кең. Көлік қоятын тұрағы да бар.

Аймақ басшысы таяуда Өскеменде тағы бір үлкен көтерме-тарату орталығы ашылатынын тілге тиек етті. Аталған сауда нысандары облысымызда кәсіпкерлікті дамытуға тың серпін беретінін айта кету керек.