ШҚО-да мал ұрлығымен айналысқан қылмыстық топ құрықталды
Фото: ШҚО ПД баспасөз қызметі
ШҚО-да 70-тен астам мал ұрлығына қатысы бар қарулы топ ұсталды, деп хабарлайды Altainews.kz сайты.
ШҚО ПД баспасөз қызметінің мәліметіне сүйенсек, қылмыстық топ мал етін елдің оңтүстігіне апарып сатқан. Келтірілген шығын көлемі 47 млн теңгеден асады.
Сондай-ақ ұсталғандардан атыс қаруының бірнеше түрі және 60-тан астам патрон тәркіленді. Қазіргі уақытта олар бойынша сараптама тағайындалды.
- Төрт күдікті жедел іздестіру шаралары барысында қолға түсті. Мал басының бір бөлігі тәркіленді. Тергеу барысында мал ұрлаушылардың иесіз жылқыларды іздегені, кейін мал ұстау орындарына жеткізіп, ары қарай жүк көліктерімен басқа аймақтағы базарларға тасымалданғаны анықталды, - дейді ШҚО ПД баспасөз қызметі.
Айыпталушылар сот санкциясымен қамалған. Қазіргі уақытта тергеу амалдары жалғасуда.
Оқи отырыңыз
