Өскеменде ШҚО Кәсіпкерлер палатасы туризм жөніндегі кеңесінің кезекті отырысы өтті. Жиынға Д. Серікбаев атындағы ШҚТУ-дың колонналық залында туроператорлардың, кәсіпкерлердің, оқу орындарының, өңірдегі табиғи қорық аймақтары басшыларының, сондай-ақ жергілікті атқарушы органдардың, қалалар мен аудандар әкімдері орынбасарларының қатысты, деп хабарлайды Altainews.kz тілшісі.

Туризм жөніндегі кеңестің төрағасы Сымбат Рамазанов жыл қорытындысын шығарып, келер жылға арналған жоспарларын белгіледі.

Туроператорлар саланың сәтті дамып келе жатқанын, өзгерістер бар екенін, бірақ әлі де көптеген міндеттерді орындау керектігін атап өтті.
ШҚО кәсіпкерлік және индустриялық даму басқармасы басшысының орынбасары Марат Қабақовтың ақпаратынша, осы жылдағы алғашқы үш тоқсанның қорытындысы бойынша өңірдің туристік саласына 11 млрд теңгеден астам инвестиция салынған. 

Ол сондай-ақ келесі жылы мемлекет атқаратын міндеттерді атап өтті. Олар – бас жоспарларды әзірлеу және цифрландыру, туристік аймақтардың қамтылуына түгендеу жүргізу, бұқаралық туристік нысандарда туристік полицияның қызметін ұйымдастыру, Зайсан қаласы мен Катонқарағай ауылында әуежайлар салу, автомобиль жолдарын жөндеу, Глубокое ауданында және Риддер қаласында қысқы спорт түрлерінің инфрақұрылымын дамыту.

Отырысқа қатысушылар білікті кадрлардың жетіспеушілігі мәселесін көтеріп, оны оқу орындарымен бірлесіп шешудің жолдарын ұсынды.

Сымбат Рамазановтың айтуынша, келесі жылы шалғай аудандардың туризм саласындағы әлеуеті одан әрі күшейе түсетін болады.

Кәсіпкерлер палатасы мен жергілікті билік бұл бағыттарды іске асыру үшін бизнес қауымдастықпен белсенді жұмыс істеп, қаржыландыру және қолдау механизмдерін қамтамасыз етуді көздеп отыр.

Туризм – облыстың экономикалық және мәдени дамуының маңызды бағыты. Табиғи байлықтарға толы өңірдің ерекше ландшафттары мен тарихи орындары туризмді дамытудың үлкен әлеуетін ашады. Ал алдағы жылдары жүзеге асырылатын шаралар Шығыс Қазақстанды туристер үшін тартымды әрі қолайлы мекенге айналдыруға мүмкіндік береді.

Ержан Әбіш