Шығыс Қазақстан облысының Самар ауданына жаңа әкім тағайындалды. Бұл қызметке Серік Жеңісов бекітілді. Бұған дейін ол облыстың ішкі саясат басқармасының басшысы болып жұмыс істеген, деп хабарлайды Altainews.kz тілшісі.

Жаңа әкімді аудандық мәслихат сессиясында ШҚО әкімінің бірінші орынбасары Нұрымбет Сақтағанов таныстырды. Ол Серік Жеңісовтің кәсібилігін және мол тәжірибесін атап өтіп, оның ауданның дамуына айтарлықтай үлес қосатынына сенім білдірді.

Серік Жеңісов өзіне артылған сенім үшін облыс басшылығына алғысын білдіріп, ауданның алдында тұрған міндеттерді орындауға бар күшін салатынын жеткізді.

Серік Жеңісов бұл лауазымға Шығыс Қазақстан облысының әкімі, Қазақстан Республикасы Президенті Әкімшілігі және аудандық мәслихат депутаттарының келісімімен тағайындалды.

Еңбек жолын 2005 жылы Өскемен қаласының ішкі саясат бөлімінде бастаған. Әр жылдары ШҚО Мемлекеттік қызмет істері және сыбайлас жемқорлыққа қарсы іс-қимыл департаментінде, ШҚО ішкі саясат басқарма басшысының орынбасары, «Шығыс ақпарат» ЖШС басқарма төрағасы, Өскемен қаласы әкімінің орынбасары, Астана қаласы «Ақпараттық-талдау орталығы» АҚ басқарушы директоры, Өскемен қаласы әкімі аппаратының басшысы қызметтерін атқарған.

Бұл тағайындауға дейін Шығыс Қазақстан облысының ішкі саясат басқармасы басшысы лауазымын атқарды.