«Обырды емдеуге жағдай жасалған, енді тек скринигті күшейту керек» - ШҚО әкімі
Шығыс Қазақстан облыстық әкімдігінде өтіп жатқан жиын барысында аймақ басшысы Ермек Беделбайұлы жауапты сала басшыларына онкологиялық аурулардың алдын алу үшін скринингтік шараларды күшейтуді тапсырды.
- Онкологиялық орталықта науқастарды емдеуге жағдай жасалған. Дәрігерлер де біліктіліктерін арттырып отырады. Енді тек скринингтік шараларды күшейту керек, - деді Ермек Беделбайұлы.
Қатерлі ісікті ерте бастан анықтау Өскемен және Риддер қалаларында, Алтай, Үлкен Нарын аудандарында бәсең. Өткен жылдың есептік кезеңімен салыстырғанда сырқаттанушылық көрсеткіші өкпе, колоректалды және ұйқы безінің қатерлі ісіктері есебінен ұлғайды. Бұл туралы денсаулық сақтау басқармасының басшысы Төлеген Жігітаев мәлім етті.
- Онкологиялық сырқаттанушылық құрылымында бірінші орында сүт безі обыры - 262 жағдай, екінші орында колоректалды қатерлі ісігі - 252 жағдай, үшінші орында өкпе обыры - 251 жағдай, төртінші орында қуықасты безінің обыры - 142 жағдай, бесінші орында асқазан обыры - 99 жағдай тіркеліп отыр, - деді Төлеген Жігітаев.
Айта кету керек, келесі жылы ШҚО-да медицина саласына бөлінетін қаражат көлемі артпақ.
Ажар Мұратқызы
Фото: Махаббат Ахметжанова
Оқи отырыңыз
