Облыс әкімі Нұрымбет Сақтағанов Шығыс Қазақстандағы қалалар мен аудандарда көктемгі абаттандыру жұмыстарының баяу жүріп жатқанын айтып, құзырлы әрі жауапты мамандардың жұмысын таразылады, деп хабарлайды Altainews.kz тілшісі.

Аймақ басшысының айтуынша, қыс аяқталғанымен, елді мекендердің келбеті әлі де ретке келтірілмеген - көшелер мен тротуарларды шаң мен құм басса, ғимараттардың қасбеттері ескірген. Ал кәсіпкерлер болса өздеріне тиесілі аумақтарды тазалауға асығар емес.

Ол аудан және қала әкімдеріне апта сайын сенбілік өткізіп, абаттандыру жұмыстарын шұғыл қолға алуды қатаң тапсырды.

Сонымен қатар, облыс әкімі коммерциялық нысандарға тиесілі аумақтарды ретке келтіру, қасбеттерді жөндеу, тозған баннерлерді алып тастау, сынған қаптамаларды ауыстыру секілді қарапайым жұмыстарды да атап өтіп, қарқынды жеделдетуді тапсырды.

Ол кәсіпкерлермен жұмыс барысында формализмге жол бермей, әр адамның мүмкіндігін ескере отырып, бірақ істі созбалаңға салмай, бірлесіп жұмыс істеу маңыздылығын алға тартты.

Фото: Махаббат Ахметжанова