Өскеменде жәрмеңке қайта жанданды
Өскемен қаласы мен қала маңындағы аудандардың шаруа қожалықтары мен жеке кәсіпкерлері бұрынғы Металлургтер мәдениет сарайының алаңында жәрмеңке өткізді. Кәсіпкерлер базарлықтарын алып келіп қала тұрғындары мен қонақтарын қуантты, деп хабарлайды Altainews.kz тілшісі.
- Зайсанның Қарабұлағынан тарысы, тарының талқаны, бидай талқаны, өзіміз дайындайтын ірімшігіміз бен құрттарымыз бар. Қоспа дайындаймыз, жылдам өтіп кетеді, - деді сатушы Күлбаран Түсіпова.
Жәрмеңкеге қайтадан жан біткеніне қала тұрғындары да, кәсіпкерлер де разы. Іркіліп қалған саудамыз қайтадан дөңгелеп, бойымызды жазып қалдық дейді ауылшаруашылық тауар өндірушілері.
- Ұлан ауданынан тары талқан, құрттар, қымыз бен қолдан дайындаған қоспамызды алып келдік. Халықтың барлығына тиімді сауда. Қалалықтар көп келеді. Тұрғындар әсіресе қолдан жасалған құрттарды сүйеді, - дейді сатушы Медина Мұхит.
Жәрмеңкеде сүт, ет өнімдері, шұжықтар, бал, көкөністер мен жемістер көптеп сатылды. Мұнда қолөнершілер де өз еңбектерінің жемісін саудаға шығарған.
Айдос Мырзахметов
Фото: Жібек Нұрахмет
Оқи отырыңыз
