Өскемен қаласында Ертіс өзені үстінен өтетін көпір астындағы бос кеңістік тиімді пайдаланылып, заманауи демалыс аймағына айналды. Жаңа қоғамдық орын қазірдің өзінде қала тұрғындарының сүйікті мекеніне айналып, мұнда серуендеп, спортпен айналысатындар қатары күн санап артып келеді, деп хабарлайды Altainews.kz тілшісі.

Абаттандырылған алаңда баскетбол алаңы, ММА-ға арналған сегізбұрышты ринг, тренажерлар, үстел теннистері, турник, велотұрақтар, киім ауыстыру бөлмелері, сәкілер мен шағын сәулеттік формалар қарастырылған. 
Сондай-ақ, аумақтың қауіпсіздігін сақтау мақсатында 8 бейнебақылау камерасы қойылған.

Өскемен қаласының әкімі Алмат Ақышев алдағы уақытта дәл осындай жайлы орындар қаланың басқа аудандарында да пайда болатындығын айтты. 

Аталған демалыс орны қаланың балансында болады. Дегенмен, бұл аумақта шағын бизнес өкілдері де жұмысын бастай алады.

Жаңа қоғамдық кеңістік – қала тұрғындарының демалып, спортпен айналысуына арналған тағы бір қолайлы орын болмақ.

Елизавета Седых

Фото: Махаббат Ахметжанова

Видео: Жалғас Сақадиев