Еліміздегі ең ірі агрожобалардың бірі – Ұлан ауданында салынатын шошқа фермасына өзге жер телімдері қарастырылып жатыр. Бұл жөнінде инвестормен келіссөз жүргізілуде.

Ауданды былай қойғанда, аймақтың экономкиасына айтарлықтай оң әсер ететін ірі инвестициялық жобаны жүзеге асыру үшін осы істі қолға алған кәсіпкерге 2021 жылы Ұлан ауданының әкімдігі 5 жер телімін ұсынған, деп хабарлайды Altaynews.kz тілшісі.

Инвесторға ұсынылған жер телімінің екеуі Ұлан ауылынан екі-үш шақырым қашық болса, үшеуі Борсақ ауылынан үш-төрт шақырымдай тұста. Алайда аталған ауылдардың тұрғындары шошқа фермасының елді мекенге жақын орналасуына қарсы екендіктерін жеткізген. Сол себепті өңір билігі бұл мәселені шешудің өзге жолдарын қарастырып, инвесторға басқа жер телімдерін ұсынып отыр.

Сондай-ақ өңір басшысы мұндай фермалар қазір халқының көбі мұсылман дінін ұстанатын көршілес елдерде де бар екенін айтты.

Жалпы бұл мал шаруашылық кешені – республикадағы ең ірі агрожобалардың бірі. Кешен іске қосылса, ет өнімдерін экспорттаудың әлеуеті артады. Ең бастысы бұл – жәй шошқа фермасы емес, жаңа технологиямен жабдықталған заманауи кешен. Онда жұмыс істейтін адамдар арнайы жамылғы киеді және жұмыс автоматтандырылған. Жұмысшы малды қолымен ұстамайтындай етіп жасалған. Жоба жүзеге асса елді мекендердің әлеуметтік-экономикалық жағдайын жақсартары сөзсіз.