Облыста жыл сайын ұйымдастырылатын 10+ және 14 + жас санаттары бойынша «Бағдарламалау», «3D модельдеу», «Робототехника» біліктіліктері бойынша 5-11 сынып оқушылары арасында «Skills for geeks» чемпионаты өтті, деп хабарлайды Altainews.kz тілшісі.

Іріктеу кезеңіне барлығы 185 командадан 1000-нан астам оқушы қатысты. Облыстың қалалары мен аудандарының 16 командасы үш өлшемді нысандарды модельдеу, бағдарламалау және спорттық робототехника бағыттарында жарысты.
Жарыс қорытындысы бойынша «3D-модельдеу» номинациясынан 10+ санаты бойынша бірінші орынды Риддер қаласының, ал 14+ санаты бойынша Зайсан ауданының командасы иеленді.
 «Бағдарламалау» номинациясынан 10+ санаты бойынша Алтай ауданының оқушылары бірінші орын алды, ал 14+ санаты бойынша «Облыстық дарынды балаларға арналған мамандандырылған «Білім-Инновация» лицейі» командасы ең мықты деп танылды.
 «Спорттық робототехника» номинациясы бойынша 10+ жас санатында «Сызық бойымен жарыс», «Кегельринг»  біліктіліктері бойынша «Дарынды балаларға арналған Жамбыл атындағы облыстық мамандандырылған мектеп-гимназия-интернаты» командасы алдыға шықты.
 «Спорттық робототехника» номинациясынан 14+ жас санатында «Кегельринг квадро», «Танк биатлоны» біліктіліктері бойынша Өскемен қаласының командалары жеңімпаз атанды.
10+ жас санатындағы жалпы командалық есепте Алтай ауданының, Өскемен және Риддер қалаларының құрама командалары жүлделі орындарды иеленді.
14+ жас санатындағы жалпы командалық есепте Өскемен қаласының, Ұлан ауданының,  «Облыстық математика, физика, информатика саласындағы дарынды балаларға арналған мамандандырылған мектеп-лицейі» құрама командалары алғашқы орындарға ие болды.
Оқушылар осы жылдың мамыр айында өтетін жыл сайынғы «New generation» 11-ші облыстық IT-фестивалінде бағалы сыйлықтармен, кубоктармен, медальдармен және грамоталармен марапатталмақ. Барлық балаларға сертификат табысталады.