ШҚО-да монша өрті азаймай тұр
Фото: ҚР ТЖМ
Тамыз айының басынан бері Шығыс Қазақстанда төрт монша өрті тіркелген, деп хабарлайды Altainews.kz тілшісі.
Облыстық төтенше жағдайлар департаментінен хабарлағандай, өткен аптаның өзінде екі монша өртенген.
– Апаттың негізгі себебі – пешті пайдалану кезінде өрт қауіпсіздігі талаптарының сақталмауы, – деп түсіндірді Төтенше жағдайлар департаменті мемлекеттік өрт бақылау басқармасының бастығы Нұржан Өміржанов.
Мамандардың айтуынша, көп жағдайда өртке түтін құбырларының ластанып, бітелуі себеп болады. Құбыр ішінде күйік пен күйе жиналып, мұның бәрі оның шамадан тыс қызуына әкеліп соғады. Пеш пен түтін жолын дұрыс орнатпау да өртке әкеледі екен.
Сонымен қатар монша иелері көбінесе қауіпті әрлеу материалдарын пайдаланатын көрінеді. Мысалы, бу бөлмесін жылу шағылыстыратын фольгамен оқшаулау жиі кездесетін тәртіп бұзушылық болып табылады. Бұған қоса электр сымдары мен розеткалардың дұрыс орнатылмауы аса қауіпті.
– Пешті жағу кезінде оны қараусыз қалдыруға болмайды. Сондай-ақ оны бақылауды балаларға сеніп тапсырмаған абзал. Ешбір жағдайда пешті жанғыш сұйықтықтармен жағуға болмайды. Моншадағы өрт қауіпсіздігі көбінесе сол монша иесінің жауапкершілігі екенін ұмытпау керек, – деп хабарлайды мамандар.
Оқи отырыңыз
