Осыдан бір ай бұрын Албания елінде мектеп оқушылары арасында шахматтан Әлем чемпионаты өткен болатын. Жаһандық додадан Қазақстандық спортшылар 4 алтын, бір күміс және 2 қолаға қол жеткізді. Осы жеңімпаздардың қатарында біздің семейлік Арыстан Есенжұловта бар. Ол небәрі 15 жасында кіл мықтыларды шаң қаптырып, алтын медальдың иегері атанды.

Жерлесіміздің әлемдік жарыста топ жарып, жеңіс тұғырының ең биік сатысына көтерілгені барша Шығыс Қазақстандықтардың мерейін асырып, абыройын асқақтатты.

Біз осындай дарынды да талапты жастарымызды әрқашан ұлықтап, ел алдында марапаттауымыз керек. Осыған орай, бүгін қала әкімі Ермак Сәлімов Арыстан бауырымызға ерекше құрмет көрсетіп, 500 мың теңгенің сертификатын табыс етті.

—Кеше ғана Арыстан диалог ретінде өткен шарада облыс әкімі Даниал Ахметовпен кездесіп,өзінің сұрақтарын қойды. Ал бүгін міне біз осы батыр баламызды толғай жеңісімен құттықтау үшін барлығымыз жиналып отырмыз. Ең біріншіден нағыз чемпион азаматты тәрбиелеп шыққан анасына алғыс білдіргім келеді, —деді Ермак Бидахметұлы.

Арыстан Есенжұлов алдағы уақытта Шри-Ланка мемлекетінде өтетін халықаралық турнирге дайындығын бастап кетіпті. Олай болса Арыстанды жеңісімен құттықтай отырып, әлемнің мықты спортшылары бақ сынайтын дүбірлі жарыста үздіктердің үздігі атануына тілектеспіз.