Адамдардың көпшілігі жеке кәсіппен тек жағдайы барлар,  қал­талы азаматтар ғана айналысады деген жаңсақ ойда жүр. Кәсіпкерлікті азын –аулақ ақшамен, тіпті қаражатсыз да бастауға болады екен.

Мадина Рақымбекова жеке кәсіпкерлігін 200 мың теңгемен бастапты. Глубокое кентінде тұратын Мадина Алматыдағы технологиялық колледждердің бірін бітіріп келген соң көптен бері көкейінде жүрген арманын іске асыруды қолға алған.

-Мен ең бірінші қадамымды Өскемендегі «Даму» кәсіпкерлікке қолдау көрсету қорынан бастадым. Осы қорға келіп екі күндік бизнес оқу курсына қатысып, қолыма кәсіпкерлікке оқыту семинарынан өткендігім туралы арнайы сертификат алдым, - дейді 20 ға енді толса да жүрексінбей жеке кәсіп көзін ашқан Мадина. -  Сертификатты алған соң мемлекеттік бағдарламаларға қатысып, несие алсам ба деген оймен өзіміздің кенттегі аудандық кәсіпкерлер палатасына бас сұқтым. Аудандық кәсіпкерлер палатасының мамандары маған кәсіппен айналысуды көздеген  ауыл тұрғындарына қолдау көрсетуге арналған түрлі  мемлекеттік бағдарламалар барынан жан -жақты мағлұматтар беріп, кеңестерін айтты.  Глубокое аудандық кәсіпкерлер палатасының  мамандары ауыл тұрғындарының «Ауыл шаруашылығын қаржылай қолдау қоры» тағы да басқа мемлекеттік несиелік ұйымдардан 5-6 пайызбен жеңілдетілген несие алып, мал  өсіруге, наубайхана ашуға, ауылда өзге де кез -келген кәсіп көзін ашуға мүмкіндіктері бар  екенін тәтпіштеп түсіндіріп берді. Палата кеңесшілерінен өз кәсібін жаңадан бастаймын деп тұрғындарға мемлекет тарапынан  3 000 000  теңгеге дейін қайтарымсыз қаржы, яғни грант берілетінін де естіп білдім. Қолымда айналымға салатын бастапқы қаражаттың жоқтығынан палата кеңесшілері маған мемлекеттік грантты алуға талпынып көруіме кеңес берді. Себебі, менің кәсіпкерлік палата мамандарымен бірлесе отырып жасаған бизнес –жобам -«Диабетпен ауыратын адамдарға диабеттік кондитерлік өнімдер өндіру»  облыста, ауданда сирек кездесетін, инновациялық бағыттағы жоба болатын. Осылайша, өзімнің бизнес жобамды  мемлекеттік грант бөлу конкурсына жіберіп, ауылда бірнеше ай конкурс өтетін уақытты тағатсыздана  күтіп жүрдім. Конкурс өтетін күн келіп жеткен кезде Өскеменге конкурстық комиссия алдына анаммен бірге барып, өз жобамды қорғап шықтым. Конкурстық комиссия мүшелері жобамның әлеуметтік –экономикалық және қаржылық негізділігіне, өнімдерді өткізу мүмкіндігіне, тиімділігіне егжей -тегжей талдау жасады.   Бірнеше күннен соң конкурс қорытындысы бойынша маған өзімнің бизнес жобамды іске асырып, диабетпен ауыратындарға арналған арнайы кондитерлік өнімдер шығару үшін мемлекеттен 1 млн.360 мың теңге гранттық ақша бөлінетіні туралы шешім шыққанын білдім. Кәсіпкер болсам дегендерге айтарым, алдымен алдыңа не істеу керек, неге жетуім керек деген сияқты нақты, айқын мақсаттар қою керек, сосын аздаған ғана қаржы қажет.

Өткен жылдың желтоқсан айында гранттық қаржы қолына тиісімен Мадина анасымен бірге «бісіміллә» деп кондитерлік тағамдар жасауға  білек сыбана кірісіп кетті.

Өзі студенттік кезден бері армандаған жеке кәсібін ашқан Мадина бүгінде кәсіпкерлікпен айналысуға деген қабілет -қарымын ақырындап болса да көрсетіп жатыр.    Кенттегі «Айман» базарының ғимаратынан  жалға алған орынға  кондитерлік цех жабдықтарын әкеліп, қойып, пісірген өнімдерін  осы жерден -ақ саудалап жатыр. Мадинаның ісінің жүруіне  бұрын кондитер маманы болып жұмыс істеген анасының да тигізіп жатқан септігі көп. Оның Глубокоеде тек өзінің тәттілерін ғана сатып алатын  тұрақты тұтынушылары да  жоқ емес.

Қазір Мадина  торт, пицца сияқты кәдімгі кондитерлік өнімдерді ғана  пісіріп жатыр. Диабеттік өнімдерге ақпан айынан бастап кіріспек. Мұндай  өнімдерді шығаруға арналған арнайы пеш алдағы айда Ресейден әкелінеді. Грантқа берілген қаржыға сол құрал -жабдықтарды сатып алуға тапсырыс беріп, күтіп отыр.