XXII Сочи қысқы Олимпиада ойындарының басталуына да санаулы күндер қалды. Көп ұзамай төрткүл дүние көз тігіп отырған әлемдік спорт бәсекесінің алауы жанады. Жүйріктердің жүйрігі сыналады. Алпауыт елдердің ең мықты деген спортшыларымен сынға түсетін біздің Қазақстанның да оғландары осал емес, деп хабарлайды Аltaynews.kz тілшісі Семей қаласының Шәкәрім атындағы мемлекеттік университеттің баспасөз қызметінің ақпаратына сілтеме жасап.
Қазақстан құрамасы спорттың 11 түрінен қатысып, 58 спортшы бақ сынайды Сочи елінің төрінде. Олардың ішінде семейлік спортшы жерлестеріміз де бар. Дүбірлі додада ұлттық құрамаға іліккен Семей қаласының Шәкәрім атындағы мемлекеттік университетінің 2 курс студенті Галина Вишневская биатлоннан сайысқа түссе, шаңғы тебу бойынша Ердос Ахмадиев пен Виктория Лончакова ел намысын қорғайтын болады.
Семейде Сочи Олимпиадасына қатысатын спортшыларды, оның ішінде семейлік спорт шеберлеріне қолдау көрсету мақсатында Семей қаласының Шәкәрім атындағы мемлекеттік университетінің оқытушылары мен студенттері «Цементник» мұз айдынына жиналды. Күннің ызғарлы болуына қарамастан олар олимпиадашыларға «Жеңіске жетсін» деген ұранмен, қысқы спорттың бірнеше түрінен жарысқа түсті. Қалың жұртшылық спорт саңлақтарымыз «Сочи-2014» байрақты бәсекесінде толағай жеңістерге жетіп, мемлекетіміздің көк туын көкте желбіретеді деп сенеді.
