Жаңаөзенде жұмысшылардың жаппай улануына қатысты қылмыстық іс қозғалды.
Бұған дейін хабарланғандай, 8 наурыз күні таңертеңгі сағат сегізден кешкі сегізге дейін Жаңаөзеннен 70 шақырым қашықтықтағы «Болашақ» стансысынан 46 адам ауруханаға жатқызылды. Олардың барлығы «АстанаСтройИмпекс» ЖШС-ның жұмысшылары. Оның 29-ы Қазақстанның, қалған 17-сі Өзбекстанның азаматтары. Тексеру кезінде мәлім болғандай, олардың барлығы қызмет орнындағы асханадан түскі ас ішкеннен кейін өздерін нашар сезініп, медициналық көмекке жүгінген.
Маңғыстау облыстық ІІД-нің баспасөз хатшысы Гүлзайда Төлеуғалиеваның хабарлауынша, оқиға санитарлық талаптардың өрескел бұзылуынан болған. Жұмысшылардың жаппай улану фактісі бойынша ҚР Қылмыстық Кодексінің 267-бабының 1-тармағына сәйкес қылмыстық іс қозғалды.
