Семей қаласындағы физика-математика бағытындағы Назарбаев Зияткерлік мектебінің 7 –ші сынып оқушысы Динара Нәдірбекова «Junior Eurovision Song Contest» халықаралық байқауы Республикалық іріктеуінің финалына шықты. «Хабар» агенттігі ұйымдастырған іріктеуде ҚР Халық әртісі Роза Рымбаева жетекшілік еткен әділқазылар алқасы 100-ден астам үміткердің арасынан тек 10 ғана өнерпазды таңдап алған екен.

Финал 22 қыркүйек күні Алматы шаһарында өтеді. Гала-концертті "Хабар" телеарнасы тікелей эфирде көрсетеді. Талап бойынша финалистерге ешбір жерде орындалмаған жаңа авторлық ән орындау міндеттелген . Ұлттық іріктеудің үздіктері көрермендердің смс хабарламалары мен әділқазылардың ортақ шешімдері арқылы анықталмақ. Ал жеңімпаз 25 қараша күні Минск қаласында өтетін «Балалар Еуровидениесіне» Қазақстан атынан қатысады.