Бүгін ШҚО-да Рухани келісім күні атап өтілді. Қазіргі күні елімізде 18, ал ШҚО-да 12 конфессия өкілі тату-тәтті өмір сүріп жатыр.

Айтулы мерекеге орай өңірдегі діни бірлестік өкілдері бас қосты, деп хабарлайды Altaynews.kz тілшісі.

Жиынға Қазақстан мұсылмандары діни басқармасының (ҚМДБ) Өскемен өңірі бойынша өкіл имамы, облыстық «Халифа Алтай» мешітінің бас имамы Ермек қажы Мұқатай, православие шіркеуінің діни қызметшісі архиепископ Амфилохий, евангелиялық христиан баптистерінің Шығыс Қазақстан шіркеуінің басшысы Владимир Вольф қатысты.

Дәстүрлі діни конфессия өкілдері өңірде жұмыс істеуіне ешқандай шектеу жоқтығын, барлық жағдай жасалғанын тілге тиек етті.

ШҚО әкімі Ермек Көшербаев еліміз рухани бірліктің бірегей орталығы екенін атап өтті. Сондай-ақ барлық конфессия өкілдерімен кездесуге және өзекті мәселелерді талқылауға үнемі дайын екендігін жеткізді.

Сондай-ақ аймақ басшысының айтуынша, өскемендік тұрғындардың өтінішімен Жамбыл саябағы ауданында жаңа мешіт салу жоспарланып отырған көрінеді.