Шығыс Қазақстан облысының әкімі Нұрымбет Сақтағанов облыс орталығы басшылығының қаладағы өзекті мәселелер туралы ақпаратын тыңдады. Олардың қатарында – жолдардағы шұңқырлар, электр қуатының жиі сөнуі, ғимараттар қасбетінің нашар жағдайы және қаланы тазалау техникасының жыл он екі ай тапшылығы бар. Облыс басшысы көп жылдан бері қордаланған мәселелерді шешуді жеделдетуге тапсырма берді, деп хабарлайды Altainews.kz тілшісі.

Өскемен қаласының әкімі Алмат Ақышов қаланың өзекті мәселелерін ащы болса да ашып айтты. Жаңа әкімге «мұра» болып қалдырылған түйткілді мәселелер қатары жылдар бойы шешілмей келгендігі анықталып отыр.
Мысалы, қаланың қысқы тазалау техникасы паркінде 100 арнайы техника бар, бірақ оның тек 15-і ғана қар тазалауға арналған. Қажетті техниканы жалға алу үшін бюджеттен қомақты қаражат жұмсалады. Облыс әкімі қала басшысына мұндай жағдайға қалалық қызметкерлердің жеке мүддесі болуы мүмкін екенін ескертіп, мәселені тереңірек зерттеуді тапсырды.

Тағы бір өзекті әрі тұрақты мәселе – жарықтың жиі өшірілуі. Нұрымбет Сақтағанов бұған себеп қате төселген кабельдер болуы мүмкіндігін алға тартты. Ол әрбір учаскеге кімдердің жауапты екенін анықтауды талап етті.

Ғимараттардың фасадтары, оның ішінде жақында жөнделгендері де нашар жағдайда. Бояуы оңып, түсі жоғалып, жарықшақтанып кеткен.

Экологиялық ахуалды жақсартуға жаппай күш жұмсап жатқанда жолдар мен тротуарлардың қарапайым құм мен шаңнан уақтылы тазартылмайтынын да аймақ басшысы тілге тиек етті. Сонымен қатар жол белгілерін, аялдамаларды, жарық бағандарын және басқа да абаттандыру элементтерін ретке келтіру қажет екені айтылды. 
Әсіресе, қала жолдарындағы шұңқырлар мәселесі көп жылдар бойы шешімін таппай келеді. Әрине, жылдар бойы осы істерге жауапты болған адамдарға құзырлы орган алдында жауап беру қажет болады. Облыс әкімі Антикор арқылы мұқият сараптама жасалуын тапсырды.

Жаңа шағынаудандардың егжей-тегжейлі жоспарлау жобасына тым жиі өзгерістер енгізу құрылыс компаниялары мен кәсіпкерлерге қолайсыздық туғызуда. Өңір басшысы бұл ережелердің қаншалықты жиі өзгеретінін және қызметкерлердің сыбайлас жемқорлыққа мүдделі болуы мүмкін екенін анықтауды тапсырды.
Айта кету керек, барлық аталған мәселелер қала үшін таңсық емес. Олар жылдар бойы өзектілігін жоймай келеді. Бұрынғы облыс әкімі Ермек Көшербаев кезінде бұл мәселелерді көтеріп, сол кездегі қалалық әкімдікке шұғыл шаралар қабылдауды қатаң тапсырған болатын. Алайда, “жабулы қазан жабулы” қалғанына ел куә. Енді бұрынғы қателіктер бүгінгі қиындыққа айналып отыр.

Фото: Махаббат Ахметжанова