Биыл елімізде қанша көмір өндіріледі
Өнеркәсіп және құрылыс министрлігі елімізде көмір өндіру көлемі мен оның бағасына қатысты түсінік берді,- деп хабарлайды Altainews.kz тілшісі Kazinform порталына сілтеме жасап.
Бұл тұрғыда жергілікті атқарушы органдардың деректеріне сәйкес, еліміздің әр өңірінде көмір бағасы 8000-нан 28000 теңгеге дейін ауытқиды. Себебі көмір кенішінен тым алыста орналасқан шалғайдағы өңірлер бар. Бағаның қалыптасуы көмірдің маркасына, тұтынушыға дейін тасымалдайтын қашықтыққа, көлік түріне, теміржол тарифтеріне және теміржол тұйықтарының орналасуына байланысты.
«Жылу беру маусымына елімізде көмірге қажеттілік шамамен 8,2 млн тоннаны құрайды. Оның ішінде коммуналдық-тұрмыстық қажеттілікке — 2,2 млн тонна, халыққа — 6 млн тонна. Биылғы 7 қазандағы жағдай бойынша өңірлерге теміржол және автомобиль көлігімен 3,3 млн тоннаға жуық көмір жеткізілді. Өңірлерді көмірмен қамтамасыз ету көрсеткіші жылдық жоспарға қатысты 40,2% болды. Көмірді жеткізу жылу беру маусымы барысында жалғаса береді, яғни осы аралықта өңірлерде қажет отын көлемі қамтамасыз етіледі», - деп аталып өткен ведомство ақпаратында.
Бұдан бұрын хабарланғандай, Үкімет басшысы Олжас Бектенов тұрғындар көмірді тұрақты бағамен сатып алуы үшін ешқандай қиындық болмауы керек екенін тапсырды.