Шығыстың бас шаһары – Өскеменде Наурыз мейрамы басталып кетті.

 Оралхан Бөкей атындағы орталық кітапханада «Амал күні» атап өтілді, деп хабарлайды Altaynews тілшісі.

Бұл күні халық қыстан аман-есен шыққанына, көктемге аяқ басып, туыс-туған, көрші-көлеңмен жүздескеніне қуанып, қол алысып, төс қағысады. Бір-біріне деген араздық, өкпе-ренішті ұмытып, амандық тілейді.

Кітапхана қызметкерлері осы бір игі дәстүрді жалғап, қала жастарын Оралхан Бөкейдің төрінде қонақ етті. Қос тарап құшақтасып қауышты. Іс-шараны ұйымдастырушылар өскелең ұрпаққа ұлттық мейрамның мән-маңызын кезекті мәрте түсіндіріп өтуді жөн көрсе керек.

Осы сәтте Алтайдың асқақ жыршысы Оралхан Бөкейдің Ұлыс күніне жазған тілегі оқылды. «...Бәр-бәріңізді құшақтар едім... құшақ жетпейді...» деген тебіреніс бар ол лебізде. Осы сөздер іс-шараның ажарын одан сайын аша түсті. Оған қоса әсем әуен әуеледі, жыр-терме де айтылды.

– Меніңше, бұл жылылық сыйлайтын мереке. Бұл күні адамдар бір-біріне ерекше мейірбан болып кететіндей көрінеді. Наурыздағы көңіл күй жыл бойына сақталса деймін. Бәлкім, ол үшін Наурыз мейрамын шын қуанышпен қарсы алу керек шығар, – дейді Алина есімді студент.

Иә, облыс орталығында ұлы тойдың дүбірі естілді. Бұған дейін хабарлағанымыздай, Ұлыс күніне байланысты жоспарланған іс-шара көп.