Өскемен амфитеатрында өзгеше концерт өтті
Фото: Аяужан Утеулинова
27 тамыз күні Өскемен қаласындағы амфитеатрда «White Party» атты кеш өтті. Кеш форматы қарапайым концерт форматынан алшақ.
Жиналған халық интерактивті ойын ойнап, арнайы алаңдардағы ойын жабдықтарын сынап көре жүріп, әуен тыңдап, би билеу мүмкіндігін алды, деп хабарлайды Altaynews тілшісі.
Ұйымдастырушылар қалыптасқан бағыттан ауытқып, жаңа дүние ұсынуды қалаған. Осындай ұсыныс тастаған ұйымдастырушыларды Өскемен әкімдігі де қолдаған.
– «White Party» кешін биыл екінші рет өткізіп жатырмыз. Былтыр қала тұрғындарына ұнағандықтан кешті жыл сайын шаһар күніне орай өткізуді ұйғардық. Кештің басты ерекшелігі – жай концерт түрінде емес, ойын алаңы түрінде өтуі. Бүгін 20-дан астам ойын-сауық алаңын құрдық. Әр тұрғын қалаған ойынын ойнап, қызыққан дүниені сынап көріп, уақытын көңілді өткізе алады. Бүгін би де, ән де болады. Шараның бірінші сағатында түрлі ойын ойнап, көңіл көтереміз, – дейді ұйымдастырушы Руслан Абдрасулин. – Біз бұл салада көп уақыт жұмыс істеп келеміз. Түрлі шара ұйымдастырамыз. Сондықтан қала әкімдігіне тұрғындарға ұнайтын тың дүние ойластыруды ұсындық. Биыл жобаның кей тұсын жетілдірдік.
Бұл күні кешті көруге ниет білдірген қала тұрғындарына арнайы талап қойылды. Ол – ақ түсті киім кию еді. Жас пен кәрі жиналған алаңда естелік суретке түсу үшін фотозона да орнатылған.
Естеріңізге сала кетсек, қала күніне орай бірқатар шара ойластырылған.
Оқи отырыңыз
