Семейде жұрттың тынышын алған 1500 адам жауапқа тартылды
Фото: egemen.kz
Абай облыстық Полиция департаментінің баспасөз қызметінің мәліметіне сүйенсек, Семей қаласында 1-курс студенттерін қабылдау кешін дүркіретіп өткізіп, халықтың мазасын алған 20 жастағы жігітке айыппұл салынды.
Семейде түнгі уақытта студенттерге арналған жатақхананың жанында жастар 1-курс студенттерін қабылдау кешін ұйымдастырған, деп хабарлайды Altaynews Кazinform агенттігіне сілтеме жасап.
Қатты дауыс жақын маңдағы үйлерде тұратын тұрғындардың мазасын қашырып, олар полицияға шағым түсірген.
– Тәртіп сақшылары 20 жастағы ұйымдастырушыға қатысты ҚР Әкімшілік құқықбұзушылық туралы кодексінің 437-бабы 1-бөлігіне (жеке тұлғалардың демалуына және тыныштығына кедергі келтіретін шұғыл қажеттілікпен байланысты емес шумен сағат 22.00-ден 9.00-ға дейінгі тыныштықты бұзғаны үшін) сәйкес әкімшілік хаттама толтырды. Осы бап бойынша жеке тұлғаларға 5 айлық есептік көрсеткіш (17 250 теңге) мөлшерінде айыппұл салынады, – деп жазылған ақпаратта.
Әлеуметтік желіде тараған видеода жатақхананың алдына жиналған жастар бір-біріне су шашып жатқаны таспаланған.
Жыл басынан өңір полицейлері түнгі уақытта тыныштық бұзған 1500-ге жуық адамды әкімшілік жауапкершілікке тартқан.
Оқи отырыңыз
