«Еңбек – адамның көркі, адам – заманының көркі» дегендей, алтын уақыттарын адал еңбекке арнап, халықтың жылы ықыласы мен алғысына бөленіп, заманының көркі болып жүрген адамдар өте көп арамызда.
Мемлекет басшысы Қасым-Жомарт Тоқаев Ұлттық құрылтайда сөйлеген сөзінде жас ұрпақты еңбекке баулудың маңыздылығына назар аударуға шақырып, еңбекқор адам ең сыйлы адам болуға тиіс деген еді. 

Кеңес үкіметі жылдарында еңбекке ерекше мән берілді. Еңбек адамы қоғамда аса құрметке ие, басты назардағы адамдар болды. Олардың еңбегі жоғары бағаланды. Жастарды еңбекке баулу шаралары да көптеп жүзеге асырылатын. Ол заманда, тіпті, әдебиеттің өзінде еңбек адамдарының образы керемет жасалған. Жазушылар еңбек адамының күрделі өмірінің көркем көрінісін көрсете білді. 
Сол кезде әр ауылда, қалада құрылыс бригадалары жұмыс істейтін. Құрылыстың да қызып тұрған кезі еді, фермалар, түрлі кешендер, балабақша, зауыт, фабрика, жұмысшыларға арналған баспаналар үздіксіз салынып жатты. Бұл жұмыстарға жастар да белсенді араласып отыратын. Түрлі кәсіби-техникалық училищелер, техникумдар құрылыс саласындағы мамандықтарды оқытты: әрлеуші-сырлаушы, тас қалаушы, ағаш ұстасы және т.б. 
Әрлеу-сырлау жұмыстарымен әйелдер айналысатын. Бұл мамандық әйелдердің жұмысы болып саналған. Қабырғаны тегістеу, сылау, әрлеу, бояу және түсқағаз жапсыру – осы жұмыстардың барлығын қыз-келіншектерден құрылған шағын бригадалар атқаратын. 
Осындай бригадалардың бірінде еңбек еткен Ольга Бабова өз естеліктерімен бөлісті. 
Ольга Васильевна Бабова – Самар ауданы Миролюбовка ауылының тұрғыны. Ол 8 сыныпты тәмамдағаннан кейін Өскеменге оқуға түсіп, әрлеуші-сырлаушы мамандығын меңгеріп шығады. Ол кездері оқудан кейін бірден құрылыс бригадаларында іс-тәжірибеден өтуге жіберетін. 

Айтуынша, олардың тұрып жатқан вагондары өте суық болған. Жылытқыш құралдарды құрылысшы жігіттер өздері қолдан жасап алады екен. Онсыз қиын. Десе де, жұмыстағы көңіл-күйге мұндай қиындықтар әсер етпепті. Ұйымшыл жастардың ынтымағы жарасып, жұмысты әндетіп жүріп, жылдам атқаратын. 

Самар ауданында белгілі ЖМБ (жылжымалы механикаландырылған баған) құрылыс ұйымы жұмыс істеді. Ол ең маңызды нысандардың құрылысымен айналысатын. Ольга Васильевнаның айтуынша, самарлық құрылысшылардың еңбегімен тұрғызылған ғимараттарды халық осы күнге дейін пайдаланып жүр. 

90-жылдардың ортасына қарай тұрғын үй құрылысының жүйесі ыдырап кеткен екен.