Құтқарушылардың апат болған, қиындық туған жерде жүретіні белгілі. Ал биыл олардың жұмысының қаншалықты ауыр екені ерекше байқалды.

Бүгін Шығыс Қазақстан облысында Төтенше жағдайлар департаментінің қызметкерлеріне құрмет көрсетілді, деп хабарлайды Altaynews тілшісі.

Еңбегі ерен, күн сайын батылдық пен өз кәсібіне деген адалдықтың үлгісі болып жүрген мамандарға марапат табысталды.

Мерекеге орай облыстық драма театрының алдында арнайы техникалардың көрмесі ұйымдастырылды. Сонымен қатар қатысушылар қызметтік борышын өтеу барысында қаза тапқан құтқарушыларды бір сәт үнсіздікпен еске алды.

Аймақ басшысы оларға апаттық-құтқару техникасының кілтін табыс етіп, қызмет ардагерлері мен өз саласының үздік мамандарын марапаттады.

Айта кетсек, бұл мерекенің елімізде тойланып жатқанына биыл жиырма сегіз жыл болды. ШҚО төтенше жағдайлар департаментінде барлығы 1600-ден астам адам қызмет етеді.

Департаменттің басшысы осы саладағы мамандардың еңбекақысы 70 пайызға өсіп, әлеуметтік жағдайларын жақсартуға бағытталған шаралар қабылданғаннан соң және заңнамаға өзгеріс енгізілгеннен кейін кәсіптің беделі көтеріле бастағанын тілге тиек етті.