Облыс орталығындағы Красин көшесі, 11в мекен жайында орналасқан «Grand Residence» көпқабатты тұрғын үй кешені рұқсат құжаттарынсыз салынып жатыр. Бұл мемлекеттік сәулет-құрылыс бақылау (МСҚБ) қызметкерлері жүргізген тексеру барысында анықталды.
Сот шешімімен құрылыс жүргізуші және алдын ала брондауды жүзеге асырған компания әкімшілік жауапкершілікке тартылды, деп хабарлайды Altaynews.kz тілшісі.

Айыппұлдардың жалпы сомасы шамамен – 525 АЕК. Алайда әкімшілік шараларға, МСҚБ ұйғарымына және сот шешіміне қарамастан нысанның құрылысы бүгінге дейін тоқтатылмаған.

Қазір құрылыс нысанының уақытында қолданысқа берілмей қалу қауіпі бар. Бұл ақшасын осы үйдің құрылысына салған тұрғындарға келеңсіз жағдай туғызуы мүмкін.
Естеріңізге сала кетейік, тапсырыс берушінің қолында бастапқы деректерді келісу қағазы және мемлекеттік сараптамадан өткен жобалау-сметалық құжаттамасы да жоқ. Сол себепті заңнамаға сәйкес, құрылыс жүргізуші аталған нысанның құрылысын бастауға құқылы болмаған. 
Ал «MRS Company» ЖШС басшысының айтуынша, олардың қолында жобалық құжаттама мен көп қабатты тұрғын үйге техникалық зерттеу қағаздары бар. Алайда қала билігі жүзеге асыратын шағын ауданды егжей-тегжейлі жоспарлаудағы өзгерістерге байланысты құжаттарды сараптау мен бекіту рәсімдері тоқтатылды. Құрылыс жүргізуші компания тексеру кезінде анықталған бұзушылықтарды жоққа шығармайды, бірақ оларды жоюға берілген уақыт жеткіліксіз болғанын айтады.

Өскемен қаласының сот актілерін орындау жөніндегі ауданаралық аумақтық бөлімі басшысының ақпаратына сәйкес, тексеру ісі сот актісінде көрсетілген барлық тармақтар орындалғаннан кейін ғана тоқтатылады. 

Айта кетейік, Өскеменде үлескерлер қаражаты есебінен тұрғын үй салып жатқан бес компания әкімшілік жауапкершілікке тартылған. Олармен де заңнамаға сәйкес тиісті жұмыс жүргізіліп жатыр.
Осы орайда аймақ тұрғындары қандай да бір құрылыс нысанына өз ақшасын салмас бұрын оған жауапты құрылыс компаниялары ұсынған құжаттар мен шарттардың талаптарын мұқият зерделеп алғаны жөн.