Жыл сайын  елімізде жатыр мойны қатерлі ісігі және оның алдын алу туралы халықаралық хабардар ету  апталығы өтеді. Осы шараның аясында ұйымдастырылатын скринингтік тексерулер өте маңызды.

Шығыс Қазақстан облысында 2023 жылы анықталған жатыр мойны қатерлі ісігінің 90 пайызға жуығы осы скрининг бағдарламасының арқасында  ерте анықталды, деп хабарлайды Altaynews.kz тілшісі.

Елімізде жатыр мойны обыры әйелдерде анықталған онкологиялық аурулардың ішінде сүт безі қатерлі ісігінен кейін екінші орында. Қазақстанда  жыл сайын 2000-ға жуық жаңа жағдай тіркеледі, олардың негізгі бөлігі 40-50 жас аралығындағы пациенттер.

Бас дәрігердің айтуынша, 2023 жылы «Қазақстан Республикасында онкологиялық аурулармен күрес жөніндегі 2023-2027 жылдарға арналған кешенді жоспар» әзірленіп, бекітілді. Ол жатыр мойны қатерлі ісігінің алдын алуға және қауіп факторларын болдырмауға бағытталған шараларды қамтиды.

Бүгінгі таңда жатыр мойны қатерлі ісігінің алдын алудың негізгі шарасы -  адам папилломавирусына қарсы вакцина салдыру.

Қазақстан ДДҰ-ның жатыр мойнын қатерлі ісігін жою жөніндегі жаһандық стратегиясына қосылды, оның мақсаты -  100 мың әйелге шаққанда 4 жағдайдан аз аурушаңдық деңгейіне қол жеткізу. Қазір бұл көрсеткіш бес еседей көп. Елімізде 11 жастағы қыздар вакцинаны 2024 жылдың қыркүйегінен бастап тегін ала алады.

Онкологиялық дәрігерлер әрдайым қатерлі ісіктің алдын алу және ерте анықтау қажеттілігі туралы айтады, сондықтан Қазақстанда скринингтік бағдарламаларға көп көңіл бөлінеді. МӘМС қатысушылары үшін скринингтер мүлдем тегін және тұрғылықты жері бойынша емханаларда өткізіледі.

Бұған дейін хабарлағанымыздай, халықаралық жатыр мойны қатерлі ісігінің алдын алу және хабардар ету апталығы аясында 27 қаңтарда ШҚО онкология және хирургия көпсалалы орталығының дәрігерлері, сондай-ақ барлық МСАК ашық есік күнін өткізеді. Осы күні таңертеңгі саға  9.00 - ден түскі 13.00-ге дейін кез келген адам учаскелік дәрігердің жолдамасынсыз онкогинеколог дәрігердің кеңесін ала алады. Тексеруден өту үшін жеке куәлік ғана қажет.