«Бақытты отбасымен» тағы кімдер баспаналы бола алады?
Фото: Валерий Шведов
Биылдан бастап бірінші және екінші топтағы мүгедектігі бар жандар да «Бақытты отбасы» мемлекеттік бағдарламасымен баспанаға қол жеткізе алады.
Бағдарламаның шарттары бойынша несие екі пайыз жеңілдікпен 20 жылға беріледі, 10 пайыз көлеміндегі алдын ала төлем мемлекет тарапынан жабылады, деп хабарлайды Altainews.kz тілшісі.
Бұл жайында «Отбасы банк» облыстық филиалы директорының орынбасары Сәуле Көкенова көпбалалы және жалғызбасты аналар үшін тұрғын үйдің кезектілігі мен жекешелендіру мәселесіне арналған дөңгелек үстел отырысында айтты.
- Бүгінде аз қорғалған отбасыларды баспанамен қамтамасыз ету үшін «Бақытты отбасы» және «Шаңырақ – нұрлы жер» мемлекеттік бағдарламалары жұмыс істейді. Бұл бағдарламалардың операторы –біздің банк. «Бақытты отбасы» арқылы жетім балалар, көпбалалы аналар мен мүгедек бала бағып отырған отбасылар пәтер ала алатын. Биылдан бастап бірінші және екінші топтағы мүгедектігі бар жандар да осы бағдарламаны пайдалана алады. Көбінде мұндай жандар (I, II топтағы зағиптар) жұмыс істемейтіндіктен оларда жәрдемақыдан бөлек кіріс болмайды. Енді мүгедектігі бар жандарға кәмелетке толған, жұмыс істейтін балалары не болмаса туған аға-қарындастары кепіл болып несие алып бере алады, - деп түсіндірді Сәуле Көкенова.
Оның айтуынша, басты шарты – несие алушы туыстарының несие тарихы дұрыс болуы керек және мойнында басқа несиелері болмауға тиіс.
Айна Ескенқызы
Оқи отырыңыз
