ШҚО-да “Ана мен бала орталығында” дауыс беруге жағдай жасалды (видео)
Өскемен қаласындағы ана мен бала орталығындағы №60 сайлау учаскесінде аналарға АЭС салу тақырыбындағы референдумға қатысып, өз таңдауларын жасауға мүмкіндік берілді, деп хабарлайды Аltainews.kz тілшісі.
Балаларын енді ғана бауырына басқан аналарға және болашақ аналарға референдумға қатысудың барлық жағдайы қарастырылған. Дауыс беріп, өз таңдауларын жасау үшін облыстық ана мен бала орталығында жабық дауыс беру учаскесі ашылды.
"Референдумға өз болашағым, балаларымның болашағы үшін қатысып, таңдауымды жасадым. Біздің дауысымыздан ұрпағымыздың болашағы айқындалады. Сондықтан біз үшін осындай дауыс беру учаскесі ашылғанына қуаныштымын. Перзентханада жатқаныма қарамастан, осындай жауапты шарадан шет қалмадым", - дейді Айгерім Смағұлова.
Ұрпағының бүгінін емес, ертеңін уайымдаған аналар, денсаулық жағдайларына қарамастан, өздерінің азаматтық көзқарасын білдіре алды.
ШҚО Ана мен бала орталығында аналарға референдумға қатысу мүмкіндігі беріліп, олардың құқықтары толығымен сақталған.
Ақерке Рағызбаева
Оқи отырыңыз
