Жемқорлықсыз болашақ – жастардың қолында (видео)
Өскемен қаласында техникалық және кәсіптік білім беру ұйымдарының студенттері арасында «Саналы ұрпақ» атты облыстық жастар слет-форумы өтті, деп хабарлайды Altainews.kz тілшісі.
Шараға Шығыс Қазақстан облысы білім басқармасы басшысының орынбасары Әлима Ақылбек, ҚР Сыбайлас жемқорлыққа қарсы іс-қимыл агенттігі ШҚО бойынша департаментінің превенция басқармасының басшысы Архат Бейсембаев, ШҚО ішкі саясат басқармасы жастармен және азаматтық қоғам институттарымен жұмыс жөніндегі бөлім басшысы Еркебұлан Балтабеков қатысты.
Шараның мақсаты - техникалық және кәсіптік білім беру ұйымдарында оқитын студенттердің бойында парасаттылықты, сыбайлас жемқорлыққа қарсы сананы қалыптастырып, оқу үдерісінің ашықтығы мен айқындылығын қамтамасыз ету.
Слеттің ашылу салтанатында 30 колледжден келген 44 студент ант қабылдап, «Саналы ұрпақ» клубының төсбелгісі тапсырылды.
Шара барысында бір алаңда студенттер үшін «Жемқорлық - ғасыр дерті» зияткерлік ойыны өтсе, екінші алаңда техникалық және кәсіптік білім беру ұйымдарының тәрбие ісі жөніндегі орынбасарлары үшін дөңгелек үстел отырысы ұйымдастырылды.
Клубқа қатысушы студенттер республикалық және халықаралық деңгейдегі шараларда да өздерін көрсете білді. Мәселен, биылғы жылдың 18 қазанында ҚР Сыбайлас жемқорлыққа қарсы іс-қимыл агенттігінің Абай облысы бойынша департаменті өткізген «Абай сөзі – әділдіктің темірқазығы» атты бірінші республикалық зияткерлік ойынында Абай атындағы Шығыс Қазақстан гуманитарлық колледжінің студенттері жүлделі бірінші орынды иеленді.
Қазақстан-Американдық еркін университеті Жоғарғы колледжінің «Саналы ұрпақ» клубы ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаменті өткізген «Парасат елшісі» республикалық байқауының үшінші кезеңіне жолдама алды.
Сонымен қатар Шығыс Қазақстан колледждерінен 500-ден астам жұмыс Ресей Федерациясының Бас прокуратурасы өткізетін «Сыбайлас жемқорлыққа бірге қарсымыз!» атты жастардың сыбайлас жемқорлыққа қарсы халықаралық жарнамалық байқауына қатысуға жіберілді.
Слет аясында постерлер сайысы, эссе сайысы, роликтер сайысының женімпаздары марапатталды. Ал ауыспалы «Адалдық» кубогы жеңімпаз команда - Өскемен құрылыс колледжінің студенттеріне табысталды.
Айжанат Бақытқызы
